Вработените во обвинителствата бараат измени: Законот не ја гарантира самостојноста на системот

Вработените во јавнообвинителската служба при сите обвинителства реагираат на Предлог-законот за јавнообвинителска служба, оценувајќи дека во сегашната форма тој не претставува реформски исчекор, туку пропуштена можност за спроведување на неопходните промени во системот.Во реакцијата посочуваат дека текстот доставен до Собранието значително отстапува од решенијата подготвени од Работната група во која учествувале претставници на Јавното обвинителство, институциите, академската заедница и меѓународните партнери.„Голем дел од решенијата што беа резултат на повеќемесечна работа не се рефлектирани во текстот на законот, без притоа да биде дадено образложение за причините поради кои се напуштени“, наведуваат вработените.Според нив, иако законот се претставува како дел од реформските процеси и исполнување на обврските од Реформската агенда, во него не се препознаваат клучните механизми за зајакнување на самостојноста на Јавното обвинителство и за издвојување на јавнообвинителската служба од системот на јавната администрација.Тие предупредуваат дека предложените решенија ги задржуваат постојните механизми на зависност во управувањето со човечките ресурси, не нудат одговор на кадровските проблеми и не предвидуваат суштинско подобрување на материјалниот статус на вработените.Дополнително, реагираат дека во предложениот текст е задржан и постојниот систем за пресметка на платите.„Најголемиот дел од одредбите се преземени од постојниот Закон за јавнообвинителска служба, додека измените се ограничени и не обезбедуваат суштински промени во системот“, стои во реакцијата.Од јавнообвинителската служба сметаат дека со ваквиот закон нема да се постигне зајакнување на институционалните капацитети на Јавното обвинителство, туку ќе останат истите слабости поради кои реформскиот процес бил инициран.Поради тоа, тие ги повикуваат пратениците пред конечното усвојување на законот внимателно да ги разгледаат нивните забелешки и да обезбедат законски решенија што ќе придонесат за поголема самостојност, ефикасност и професионализација на јавнообвинителскиот систем.