Пет лица биле лишени од слобода поради семејно насилство, додека во последното деноноќие во полиција биле пријавени вкупно шест случаи на насилство во семејството, информира Министерството за внатрешни работи.Најновиот случај е регистриран ноќеска во Струмица, каде што била приведена 59-годишна жена од струмичко село, осомничена дека физички ги нападнала својата снаа и малолетниот внук.Во Гостивар бил уапсен 53-годишен маж кој, според пријавата, физички го нападнал својот син, а потоа со остар предмет им се заканувал нему и на неговата мајка.Во Битола, 35-годишник бил лишен од слобода поради напад врз сопругата, на која ѝ нанел повреди, додека во Велес бил приведен 28-годишник кој, и покрај судска забрана, се заканувал на своите родители, оштетил дел од инвентарот во домот и предизвикал страв кај членовите на семејството.Во Куманово, полицијата привела 39-годишен маж осомничен дека физички ја нападнал својата 62-годишна мајка, која според пријавеното подолг период трпела психичко и физичко малтретирање.Шестиот случај бил пријавен во Скопје, каде 41-годишна жена пријавила дека била физички нападната од нејзиниот сопруг.Од МВР информираат дека се преземаат мерки за целосно расчистување на сите случаи, по што против сторителите ќе бидат поднесени соодветни пријави.
Сподели го овој напис