(ВО ЖИВО) Наталија, сопругата на Андреј ДНК: Секоја жена би посакала татко и сопруг како него, другите надвор гледаат бои, ние сивило

Вечерва во „Претрес со Ландов“, Наталија Ѓорѓиеска, сопруга на Андреј од ДНК, кој загина во „Пулс“, говори за кобниот 16 март минатата година и за животот потоа.„По еден тежок период собираме сила да продолжиме да живееме, додека едни надвор гледаат бои, ние гледаме сивило. И Андреј би сакал да продолжиме натаму, јас морам да продолжам“, вели Наталија Ѓорѓиеска.Со Андреј се виделе вечерта пред да замине за Кочани; таа со ќерката била на прослава на роденден кога тој заминал за Кочани.„Јас последна дознав за несреќата од сестра ми во присуство на ќерка ми. Полицијата чукаше силно на врата и го бараше Андреј; него го немаше на ниту еден список од болниците. Кога стигнавме во Кочани, од обезбедувањето на претседателката, која даваше изјава, бев спречена да се приближам да прашам што се случува со мојот сопруг. Имаше информација од еден медиум дека Андреј е дома. Не можам да ја разберам суровоста на медиумот. Некој од безбедноста со дрзок глас ми се јави да ме праша каде е мојот сопруг. Потоа ме принудија да одам во една просторија да го препознаам Андреј. Не бев во состојба и препознавањето го направи неговиот другар“, вели сопругата на Андреј.На ќерката ѝ соопштила дека нејзиниот татко веќе не е со нив.„Таа не го прифаќаше ова, се затвораше во соба, не јадеше. Јана не прашува ништо. Андреј ни беше пред сè другар, а не само татко и сопруг. Тој нè чуваше под стаклено ѕвоно. На секоја жена би ѝ посакала таков сопруг“, вели Наталија.Претходно во „Претрес“, таткото на загинатиот Диме рече дека ако може да го чуе сега, неговиот син би му рекол дека прават сè за да се дознае вистината.„На моите две внучиња ќе им кажам дека злобни луѓе им го земале татко им“, рече Димитриев.