(ВО ЖИВО) Таткото на загинатиот Диме од Пулс: Дали газда Деко мирно спие, дали го прогонуваат криците на загинатите деца, дали некого заштитува

Кире Димитриев, татко на загинатиот Диме во дискотеката „Пулс“, месечно оди на неколку рочишта од судењето за трагедијата која зема 63 жртви. Не знае кога ќе заврши судскиот процес. „Животот ни се подели пред и по трагедијата. Кога слушаме какви пропусти имало, прашуваме кој не постапил. Со секој судски процес раната се отвора и продолжува да крвари“, вели Димитриев.Работава смета дека се разводнува, а на некои бранители тоа им одговара. „Не бараме по секоја цена брз завршеток, туку да се дојде до виновниците. За секој од нив има вина и докази. Има сомневање бидејќи не знаеме што е вистина, а што не. Не знаеме дали има калкулации за сменет исказ на еден од сведоците“, вели таткото на Диме и кажува дека адвокатите некогаш и ги провоцираат.„Од Деко, газдата на Пулс, знаејќи го, не очекував да признае кривична одговорност, но барем да почувствува морална одговорност“, вели Димитриев.Никој од обвинетите, посочува, не ни пристапи и да каже дека жали, само имало некои вештачки зборови за да се намали одговорноста.„Подобро Деко да не е пред мене. Не е закана. Генерација бевме со него. Би го прашал дали кажал сè што знае, дали заштитува некого и после сè дали вредеше да бидат убиени 63 млади за некој да има корист, дали може да спие мирно, дали му излегуваат криците на децата“, прашува таткото на загинатиот Диме.