СВР Скопје го расчисти случајот со нападот врз 11-годишно девојче од Чаир, кој беше снимен и објавен на социјалните мрежи. Како што информираат од МВР, по преземени мерки и активности од полициски службеници од ЕВР Центар и Бит Пазар, утврдено е дека на 20 јуни 2025 година околу 14 часот на ул. „Павле Илиќ“ во Скопје, во близина на угостителски објект, девојчето било физички нападнато од три малолетнички, додека четврто девојче го снимало нападот со мобилен телефон.
Видеото од настанот во изминатите денови било споделено на социјалните мрежи и на еден портал. Случајот во полициска станица го пријавил таткото на нападнатото девојче на 1 септември 2025 година, откако дознал за настанот преку интернет. Според неговата изјава, ќерката молчела за нападот поради страв од ново насилство.
Малолетничките и нивните родители се повикани во полициска станица, а по целосно документирање на случајот ќе бидат поднесени соодветни поднесоци за кривичните дела „насилство“ и „неовластено снимање“.