Министерот Панче Тошковски рече дека секој што има вина во МВР, а е поврзан со неспроведување на процедури, ќе одговара. Ова го кажа како одговор на прашањето како Артан Груби бил пропуштен на граница и дали бил на „стоп листа“.
Според Тошковски, обвинети имаат избегано и пред подолго време, додека само еден, избегал непосредно пред акцијата со претреси и апсења.
„Еден од нив, на десет минути пред да се влезе во објектот каде истиот престојува го напушта објектот. Претпоставуваме дека тоа е бидејќи излегла одредена информација од одредени нечесни ‘професионалци’ и да, како за сите, така и за тие, се надевам дека за сите до еден ќе обезбедиме докази за да се најдат пред лицето на правдата, па да видат како е да си вистински криминалец“, додаде Тошковски.
Со ова се отвори прашањето, дали Артан Груби е лицето кое избегало на десет минути пред негово евентуално апсење.