Министерството за внатрешни работи објави дека вработените во полициските станици за граничен надзор Танушевци и Блаце се за првпат посетени од министер. Панче Тошковски отишол за да ги чуе нивните проблеми. Ова е вторпат за краток период, службениците посетени од Тошковски да истакнат дека биле заборавени од неговите претходници.
„На крајот на средбите, беа донесени неколку заклучоци од аспект на можни решенија на дел од проблемите а од страна на министерот беше потенцирано дека ќе се преземе сѐ што е можно во овој период, имајќи ја предвид техничката природа на моменталната Влада и ограничувањата кои таа ги носи, а од нивна страна беше изразена благодарност што за првпат се посетени од еден министер“, се вели во соопштението на МВР.
Пред десетина дена, Тошковски беше и во секторот на МВР во Неготино, каде службениците исто така му посочиле дека досега, биле невидливи за неговите претходници.
„..Исто така, ја искористив приликата да ги посетам и управните служби во Неготино каде од страна на вработените ми беа презентирани проблемите со кои се соочени во секојдневното работење и беше потенцирано дека за првпат се посетени од еден министер“, напиша министерот Тошковски.