Во последните 24 часа полицијата регистрирала осум случаи на семејно насилство на подрачјето на државата, при што шест лица биле лишени од слобода поради физички напади, закани и агресивно однесување кон членови на семејството.Во Штип бил приведен 36-годишен маж кој, според пријавата, физички го нападнал својот 66-годишен татко во семејниот дом. Во Охрид, пак, полицијата привела 54-годишен охриѓанец кој агресивно се однесувал кон својата мајка и оштетил дел од покуќнината.Во Дебар бил лишен од слобода 24-годишен маж по пријава дека физички ја нападнал својата сопруга, додека во Куманово полицијата привела 39-годишна жена која, според пријавата на нејзината мајка, физички ја нападнала и оштетила дел од покуќнината во домот.Два случаи се регистрирани и во Велес. Приведен е 35-годишен велешанец кој по расправија физички ја нападнал својата поранешна партнерка, како и 24-годишна жена која, според пријавата, го нападнала вонбрачниот сопруг на нејзината мајка, употребувајќи и остар предмет со кој му нанела повреда.Дополнително, во Скопје биле пријавени уште два случаи. Педесетгодишна жена од Карпош пријавила дека нејзин внук ѝ се заканувал и фрлал камења кон куќата, додека 32-годишна жена од Кисела Вода пријавила дека била физички нападната од својот поранешен сопруг.Од МВР информираат дека се преземаат мерки за целосно расчистување на сите случаи, по што против сторителите ќе бидат поднесени соодветни пријави.
Сподели го овој напис