Фиктивни купувачи, фалсификувани потписи и заработка од над 1,4 милиони денари од дрва во Радовиш

Полицијата поднесе кривична пријава против 43-годишен жител на општина Конче и правен субјект од Радовиш поради сомнение за злоупотреба на службената положба, фалсификување документи и незаконско стекнување имотна корист од над 1,4 милиони денари.Како што информираат од СВР Струмица, пријавениот С.К., како одговорно лице во фирмата, изготвувал фиктивни испратници за продажба на дрвни сортименти, адресирани до непостоечки лица и без наведени адреси за испорака. Во дел од документите биле вршени и корекции на количините и видот на огревното дрво.Со ваквите активности, според истрагата, бил овозможен промет на незаконски стекната дрвна маса од 173,31 кубни метри, при што била остварена противправна имотна корист од 864.262 денари.Дополнително, при проверка на 27 испратници било утврдено дека постојат значителни разлики меѓу прикажаните и реално испорачаните количини. Наместо евидентираните 46 кубни метри, на терен биле испорачани 149 кубни метри огревно дрво. Со продажбата на дополнителни 103 кубни метри дрва, пријавените стекнале уште 566.500 денари противправна корист.Истрагата покажала и дека С.К. фалсификувал потпис на овластено лице во делот „одговорно лице“ на испратниците, по што документите биле користени како валидни исправи во правниот промет.Според полицијата, со овие дејствија пријавените оствариле вкупна противправна имотна корист од 1.430.762 денари.