Лажно се претставувале како 14-годишно девојче и намамувале мажи на средби, потоа ги снимале и објавувале на интернет

Шестмина млади битолчани, меѓу кои и еден малолетник, заработија кривични пријави откако подолг период организирано мамеле машки лица преку лажен профил на социјалните мрежи, а потоа ги снимале, понижувале и јавно ги објавувале нивните лични податоци.Од Министерството за внатрешни работи информираат дека СВР Битола поднела кривична пријава против Н.Р. (22), М.И. (19), О.Н. (19), Л.Г. (19), А.Д.В. (18) и 15-годишник, сите од Битола, поради сомнение за сторени кривични дела „насилство“, „злоупотреба на лични податоци“, „неовластено снимање“ и „самовластие“.Според истрагата, од февруари 2025 година пријавените дејствувале како организирана група и преку лажно креиран профил на социјалните мрежи се претставувале како 14-годишно девојче. На тој начин воспоставувале комуникација со машки лица и договарале средби на различни локации во Битола.Кога оштетените ќе пристигнеле на договореното место, биле пресретнувани од членовите на групата, кои ги снимале без нивна согласност, ги навредувале, омаловажувале и психички ги малтретирале. Според МВР, тие биле принудувани да даваат изјави дека се „педофили“, по што снимките и нивните лични податоци биле јавно објавувани на социјалните мрежи.Со ваквите постапки кај оштетените биле предизвикани страв, понижување и чувство на загрозена сигурност.