Ја киднапирал и ја претепал девојката по матурска прослава: се бара притвор за 40-годишен битолчанец

Основното јавно обвинителство Битола поведе постапка против 40-годишен битолчанец, осомничен за кривичните дела „Телесна повреда“ и „Противправно лишување од слобода“.Според обвинителството, осомничениот на 23 мај во раните утрински часови противправно ја затворил, ја држел и телесно ја повредил 18-годишната девојка со која биле во блиски лични односи.Девојката се враќала од матурска прослава кога осомничениот ја пресретнал со автомобил. Таа влегла во возилото, по што тој почнал да вози, ѝ го зел мобилниот телефон и не ѝ дозволувал да замине.„Оштетената го молела да ја пушти да излезе и кога запреле на една локација се обидела да го напушти возилото, но осомничениот тргнал по неа и започнал да ја удира“, информира обвинителството.Потоа повторно ја внел во автомобилот и продолжил физички да ја напаѓа со тупаници, нанесувајќи ѝ телесни повреди и крварење од носот.Девојката успеала да се ослободи и со помош на случаен минувач побарала помош.Обвинителството наведува дека постои опасност од бегство, но и дека осомничениот и претходно се јавувал како сторител на насилство и други кривични дела. Дополнително, според обвинителот, начинот на извршување на делото укажува на „особено насилнички и контролирачки порив кон младата жртва“.Поради тоа, до судијата на претходна постапка при Основниот суд Битола е доставен предлог за определување мерка притвор.