Министерството за внатрешни работи информира за повеќе пријавени случаи на физичко насилство и нарушување на јавниот ред и мир регистрирани во текот на 4 декември во Скопје и околината.
Според МВР, во 15 часот во СВР Скопје, 39-годишна скопјанка пријавила дека на 25 ноември, во семејниот дом во општина Аеродром, нивната 15-годишна ќерка била физички нападната од нејзиниот сопруг Д.К. (43), кој, според пријавата, употребил и тврд предмет. Полицијата презема мерки за расчистување на случајот.
Истото попладне, во 19:40 часот, 30-годишен маж од Пробиштип пријавил дека бил физички нападнат во Гази Баба од 66-годишниот Ј.И. од Скопје. По документирање на случајот ќе следуваат соодветни поднесоци.
Во уште два одвоени случаи, родители пријавиле физички напади врз нивни малолетни деца во основни училишта. Во Шуто Оризари, мајка пријавила дека нејзиниот деветгодишен син бил нападнат од баба на негов соученик. Во Карпош, 43-годишна жена пријавила дека нејзината малолетна ќерка била нападната од ученик од истото училиште. За двата случаи се преземаат мерки за понатамошно расчистување.
Во 21:55 часот, полициски службеници од СВР Скопје привеле 43-годишна жена од селото Мршевци на подрачјето на Ѓорче Петров, поради агресивно однесување кон полицајците кои извршувале службени дејствија. По целосно документирање на случајот ќе биде поднесен соодветен поднесок.