Град Скопје започна широка и засилена акција против дивите превозници во главниот град, со која, според градоначалникот Орце Ѓорѓиевски, конечно треба да се воспостави ред во дејноста на јавниот превоз. Инспекторатот денес излезе на терен, а фокусот е насочен кон нелегалните такси-возила, комбиња и автобуси кои со години работат без лиценци и без каква било контрола.
„Законите мора да се почитуваат, ред ќе има“, порача Ѓорѓиевски, додавајќи дека оваа мерка била најавена уште во предизборието. Сега, како што вели, таа се реализира со цел да се заштитат граѓаните и да се обезбеди фер конкуренција меѓу превозниците.
Со новата акција, сите возила кои нелегално вршат превоз ќе бидат одземани на шест месеци, а инспекторатот ќе изрекува казни преку платни налози. Градоначалникот нагласува дека целта не е казнување по секоја цена, туку воспоставување здрав систем во кој секој што работи – работи законски и одговорно.
Засилените контроли ќе продолжат секојдневно и ќе се интензивираат во наредните денови. Од Градот уверуваат дека со ова ќе се подобри безбедноста и предвидливоста на јавниот превоз, а скопјани ќе добијат сигурна услуга без импровизации и ризици.
„Скопје мора да биде град во кој законите важат за сите, во кој редот е правило, а не исклучок“, порача Ѓорѓиевски, најавувајќи продолжување на акциите за уредување на градот.
