Во текот на изминатото деноноќие, полициските службеници на територијата на целата држава лишиле од слобода 24 возачи поради безобѕирно управување со моторни возила, информира Министерството за внатрешни работи.Од нив, 17 лица управувале возила без возачка дозвола, а меѓу нив имало и четворица малолетници. Двајца од возачите кои немале возачка дозвола биле затекнати и под дејство на алкохол.Приведени биле четири лица во Прилеп, меѓу кои и еден малолетник, две лица во Битола, три во Скопје и по едно лице во тетовско, Тетово, Гостивар, Кавадарци, Неготино, Штип, Кочани и Гевгелија. Малолетници биле затекнати и во Тетово, Гостивар и Неготино.Еден од возачите во Скопје, како и возачот во Штип, покрај тоа што немале возачка дозвола, управувале возило и под дејство на алкохол.Дополнително, поради управување возило и покрај изречена забрана, биле приведени по едно лице во Гостивар и во прилепско.Под дејство на алкохол биле затекнати уште двајца возачи во Прилеп и по еден во Крива Паланка, Битола и Гевгелија.Од МВР најавуваат дека по целосното документирање на случаите ќе бидат поднесени соодветни кривични пријави.„Апелираме до сите учесници во сообраќајот да ги почитуваат сообраќајните правила и прописи, да не управуваат возило без положен возачки испит, доколку имаат изречена мерка за забрана за управување или доколку се под дејство на алкохол, и сите заеднички да придонесеме за побезбеден сообраќај“, соопшти МВР.
Сподели го овој напис