Основното јавно обвинителство Скопје поведе постапка против 36-годишен скопјанец, осомничен за кривичните дела телесна повреда, загрозување на сигурноста и предизвикување општа опасност, по инцидент на семејно насилство што се случил синоќа во неговиот дом.Според Обвинителството, околу полноќ осомничениот физички ја нападнал сопругата и нејзината мајка, а потоа почнал да вика и да им се заканува на сопругата и на нивните две малолетни деца, на возраст од шест и четири години. Кога сопругата побарала да престане, тој ја оттурнал и ѝ нанел телесни повреди.Во нападот продолжил да крши покуќнина, а со клуб маса замавнал кон мајката на сопругата, при што ја повредил во пределот на ногата и градниот кош. Осомничениот се заканувал дека ќе ги убие сите присутни, па дури и дека ќе го задави сопственото дете. Во еден момент извадил нож и замавнувал со него, предизвикувајќи страв и чувство на загрозеност кај оштетените.Сопругата успеала телефонски да ги повика нејзиниот татко и брат, но осомничениот продолжил да им се заканува и ним. Потоа од боксот во дворот го пуштил своето куче од расата шарпланинец, кое нападнало еден од оштетените и го гризнало за надлактицата и потколеницата, нанесувајќи му повреди.Имајќи ги предвид тежината на дејствијата, опасноста од бегство и можноста осомничениот да го повтори насилството, јавниот обвинител до судијата на претходна постапка при Основниот кривичен суд Скопје доставил предлог за определување мерка притвор.
Сподели го овој напис