Нелегално ископале околу 5.000 кубни метри минерални суровини кај Струга, поднесени кривични пријави

Надворешната канцеларија за криминалистички работи Струга поднесе кривична пријава против А.З. (34) од селото Заграчани и Л.Х. (46) од селото Калишта, поради сомнение за сторено кривично дело „незаконита експлоатација на минерални суровини“.Според информациите од Министерството за внатрешни работи, во атарот на селото Вишни, првопријавениот А.З., без да поседува концесија или дозвола издадена од надлежен орган за експлоатација на минерални суровини, го ангажирал второпријавениот Л.Х. за вршење ископ со багер и транспорт на материјалот со товарно возило.При вонреден инспекциски надзор спроведен од Државниот инспекторат за техничка инспекција било утврдено дека пријавените незаконски ископале околу 5.000 кубни метри минерална суровина на површина од 10.104 квадратни метри.Од МВР информираат дека експлоатацијата била извршена без соодветна концесија, поради што против двајцата се поднесени кривични пријави.