Алкохолизиран жител на Росоман нападнал 18-годишник и се заканувал на градоначалник преку социјални мрежи

Жител на Росоман е приведен откако во алкохолизирана состојба го нарушил јавниот ред и мир, физички нападнал младо лице и претходно објавувал содржини со заканувачки карактер кон градоначалникот на општината, соопшти Министерството за внатрешни работи.Според информациите од МВР, на 31 мај околу 00:40 часот, полициски службеници од ОВР Кавадарци го привеле И.А. (35) од Росоман, кој на улицата „Пролетерска“ се однесувал дрско и непристојно и не постапувал по наредбите на полицијата при извршување службени дејствија.Дополнително, било пријавено дека во угостителски објект во Росоман физички го нападнал Л.Л. (18) од селото Паликура, при што употребил стаклен предмет.По извршените проверки било утврдено дека И.А. бил под дејство на алкохол, а алкотестот покажал 1,03 промили алкохол во крвта.Од МВР информираат дека претходно, на 30 мај, со него бил извршен службен разговор по пријава дека во периодот од април годинава преку социјална мрежа објавувал содржини насочени кон градоначалникот на Општина Росоман, Ѓ.К. (37), со што кај него предизвикал чувство на страв и загрозеност.За двата случаи бил известен јавен обвинител, а по нивното целосно документирање против лицето ќе бидат поднесени соодветни пријави.