Родител влегол во училишен двор и нападнал дете по расправија меѓу ученици: го удирал со шлаканици и тупаници

Основното јавно обвинителство Скопје поведе постапка против 49-годишен маж осомничен за кривично дело „Насилство врз дете“ по инцидент што се случил во дворот на основно училиште во Илинден.Според информациите од обвинителството, на 22 мај осомничениот извршил физичко и психичко насилство врз дете родено во 2013 година.Инцидентот се случил откако синот на осомничениот имал недоразбирање со свој врсник во училишниот двор, по што го повикал таткото. Кога пристигнал во училиштето, 49-годишникот најпрво почнал да му упатува навреди, пцовки и погрдни зборови на другото дете, а потоа и физички го нападнал.„Во еден момент и физички го нападнал со удари со шлаканици и тупаници во главата и телото, нанесувајќи му телесни повреди – расекотини и подливи“, соопшти обвинителството.Јавниот обвинител до судијата на претходна постапка доставил предлог за определување мерки на претпазливост. Се бара осомничениот редовно да се јавува во судот, како и да му биде изречена забрана за приближување до оштетеното дете.