Премиерот Христијан Мицкоски остро реагираше по одлуката на Обвинителството за гонење организиран криминал и корупција да ја запре истрагата за набавката на мазут за ТЕЦ Неготино, во која беа опфатени поранешниот директор на ЕСМ, Васко Ковачевски, бизнисменот Ратко Капушевски и сопственикот на „Пуцко Петрол“, Асмир Јахоски.Мицкоски рече дека бил шокиран од одлуката и предупреди дека доколку предметот не биде преиспитан, Обвинителството ќе го изгуби кредибилитетот.„Со неверување ја слушнав таа вест. Второ бев шокиран од тоа што го слушнав. Добро е што АД ЕСМ, поранешно ЕЛЕМ, кога ќе ја добие одлуката ќе вложи жалба. И очекувам дека случајот пак ќе се разгледа и повторна анализа“, рече Мицкоски.Тој директно го спомена и шефот на Обвинителството за гонење организиран криминал, Ислам Абази.„Ако тоа не се случи, Обвинителството за гонење на организиран криминал го губи својот кредибилитет. Јавноста знае за каков обвинител станува збор кога зборуваме за Ислам Абази“, изјави премиерот.Мицкоски додаде дека разговарал и со јавниот обвинител Ненад Савески, кој, според него, рекол дека не бил информиран за одлуката.„Вчера разговарав и со јавниот обвинител Ненад Савески. Тој рече дека не бил информиран за оваа одлука на Ислам Абази“, рече Мицкоски.Претходно, обвинителката од ОЈОГОКК Катерина Коларевиќ соопшти дека истрагата е запрена бидејќи не биле пронајдени доволно докази за кривично дело, ниту била утврдена штета за државата.Според обвинителството, во услови на енергетска криза, набавката на мазут овозможила ТЕЦ Неготино да произведува струја по значително пониски цени од тие на берзите и со тоа биле избегнати рестрикции.Истрагата беше отворена по кривична пријава на МВР, во која се тврдеше дека преку спорните набавки е направена штета од над 167 милиони евра и постоеле сомнежи за перење пари.
