(Видео) Министерот за здравство во „Претрес“: „Треба да се срамиме сите за недостигот на терапија за рак“

Министерот за здравство Азир Алиу во поткастот „Претрес со Ландов“ призна дека недостигот на терапија за онколошките пациенти е сериозен проблем, оценувајќи дека „треба да се срамиме сите“.Во директен разговор со новинарот Кристијан Ландов, темата беше состојбата на Клиниката за онкологија и недостигот на лекови.„Навистина е непријатно и треба да се срамиме сите“, изјави Алиу.На прашањето дали лично се срами, министерот одговори:„И јас се срамам, бидејќи тоа е дел од процесот“, додавајќи дека негова обврска е да работи за ваквите состојби да не се повторуваат.Ландов, пак, директно го соочи со реалноста на пациентите кои се враќаат без терапија.„Замислете ситуација – се борите за живот, одите на онкологија и ви велат нема терапија. Како ќе се чувствувате?“, праша Ландов, додавајќи дека станува збор за континуирана терапија, а не за обични лекови.Министерот како причина за проблемите ги посочи системските слабости и законските процедури.„Имате закони кои треба да ги менувате. Работиме на дванаесет закони, еден од нив е поврзан со лекови. Целата процедура ќе се скрати – ако траела со месеци, сега ќе трае со недели, со дигитализација и оптимизација“, рече Алиу.Но, Ландов потенцираше дека јавноста не очекува ветувања, туку решенија веднаш.„Вие не сте кандидат за министер, туку ресорен министер. ‘Ќе’ не ме интересира“, му порача тој.Во разговорот беше посочено дека пациенти повторно биле враќани без терапија, а дел од нив биле принудени сами да купуваат лекови на приватно, при што особено погодени се новите пациенти.„Ќе чувствувате ли грижа ако некој пациент го изгуби животот поради недостаток на терапија?“, праша Ландов, отворајќи ја дилемата за одговорноста на институциите.На овие и многу други важни прашања, каде од министерот се бараа одговори одговорност, погледнете тука: